logo

من دواس وحرب الأخوة ينطلق العرض نحو حريق والوطن وجراحاته ، حيث يجسد ما تخلفه تارات النفس والدم ، دون أن ينسى أشواق الناس والأرض للسلم والعدالة والخضرة بدلا من الظلم والدمع والدم ، أستمع لهؤلاء الناس ما الذي ينشدوه (غدير : تار حسين هسع أجلوا ، ورونا تركته ومراحه الخلاهم دايرين تسوا فيهم شنو ؟

بكري : المراح قبيل قسمناهو ، ألبل والبقر الكبار هيلي أنا والبهم الصغار حقات ود عمي صالحين .

صالحين : وكت أنت شلت البهائم الكبار أنا بشيل الصغار علا معاهم الارض .

بكري : الارض أنت شن عرفك بيها ، الارض هيلي ، أنا أديتك البهم الصغار البيلد ويزيد ، شيلن وأسرح في الوديان .

صالحين : كضبت الأرض هيلي وياني القاعد ومعمرها بالزراعة ، أسرح أنت أن بقيت سارح .

بكري : (  يستل خنجره ) أن ده كلامك ورني رجالتك .

صالحين : ( يستل خنجره ) أفو أنا بسألوني من رجالتي .

غدير : ( يقف بينهما ) عشان كلامكم ده الناس الهناك وزعوا مراح وتركة حسين وقالوا بكري نصيبه كدي وصالحين نصيبه كدي والناس الهناك نصيبهم كدي .

بكري : ( مستنكرا ) الناس الهناك ؟ مالن ومالنا .

صالحين : الناس الهناك؟  مالن ومال حسين؟ 

سلمى : الناس الهناك؟  قاعدين معانا هنا عشان يقسموا مالنا ؟

مفاز : الناس الهناك مفتكرننا عبيد وهوان ، ونحن أسياد بلد ، الناس الهناك ما عندهم معانا نضم .

غدير : يا أخوانا عيب عليكم الكلام ده ، الناس الهناك لحمكم ودمكم ، وهم البديروا البلد وينظروا في شأنكم ، الناس الهناك سماع كلامهم واجب .

مفاز : قبيل ما سمعوا كلامنا مالم ؟

غدير : قبيل متين ؟

سلمى : وكت قلنا دايرين المدرسة والشفخانة والبير أبو كلامنا

مفاز : وكت قلنا ليهم زولنا البقعد معاكم هناك نختاره نحن ونعزل نحن . ابوا كلامن وقعدوا يسلسلوا من وليداتن الدايرنوا هم ويقعدوهم معاهم هناك بعد يملصواجلدنا ويلبسوا جلد الناس الهناك  .

سلمى : الناس الهناك ما عندهم معانا نضم

بكري : وكت جابت ليها تحشر من الناس الهناك أنا خليت نصيبي في تركة حسين لود عمي .

صالحين : أنا زاتي عافيتك وكت الناس الهناك دايرين يتحشروا في شأننا .

بكري : أن بقى كدي هياك على دواس الناس الهناك .

صالحين : أنا وأنت وكلنا على الناس الهناك

غدير : دواس الناس الهناك؟  أنتوا جنيتوا وعقلكم ودر .

سلمى : الناس الهناك بيداوسوكم هنا ما هناك

مفاز : أيوة ، وأن داوسوكم هنا الوليدات البيموتوا في الدواس وليداتكم ما  ، ما ولادم هم .

سلمى : الأرض البتحرق بالدواس أرضكم ما أرضهم .

بكري : يموتوا الوليدات تحرق الأرض ولا الحقارة والمسخرة

غدير : الناس الهناك ما بتداوس ، شوفوا ليكم معاهم صرفة غير الدواس .

بكري : تقصد شنو ؟

غدير : أقصد تسايروهم ، تناضموهم بالتي هي أحسن .

صالحين : نضمنا لامن حلوقنا نشفت ، بعد ده ما عندنا معاهم نضم . كتال بس .

سلمى : كتال لا . حسين أخوي ما زول كتال .

بكري : حسين أخوك شن دخلوا هسع في النضم .

سلمى : الدواس ده ما في شان تركة حسين أخوي ؟

الجميع : أيوة

سلمى : أن بقى كدي تسوا سواة حسين في أمركم مع الناس الهناك . )

Leave a comment